وكالعادة بقول انا هاني اب لابن توحد عمرة سبع سنين ونص بحكي تجربة.
مش ملزمة لاحد
كل حالة وليها نظام
ارجع للمتخصص
وان تأتي متأخرا خير من إلا تأتي ابدا
رسالتي للمجتمع للأهل والأقارب والعيلة
رسالة إلى الناس الطيبة اللي بتحكم على الناس باللي ظاهر ليها في لحظة معينة.
رسالة إلى مجتمعنا اللي محتاج يتعلم ويتعود يتقبل بعضة ويتقبل اللي مختلف معاه سواء في الشكل او في الفكر او المضمون.
رسالة لمجتمعنا العربي اللي محتاج علم ووعي ودراية عن كيفية مراعاة شعور أمهات وآباء أطفال القدرات الخاصة.
رسالة لمجتمعنا اللي محتاج إعادة تأهيل وتعديل سلوك قبل ولادنا. فعلا المجتمع محتاج ينضبط نفسياً واجتماعياً وسلوكياً.
رسالة للأهل والأقارب.. اللي بعدوا عن بنتهم لمجرد ان ربنا رزقها ابن من ذوي الهمم..
رسالة للأهل اللي قاطعو ابنهم وقللو زيارتهم ليه وأصبح ضيف غير مرحب بيه في المناسبات عشان دوشة وصراخ وبكاء ابنه اللي مالوش ذنب في اللي بيعملة.
رسالة للجيران اللي قفلوا بابهم في وجه أبناءنا وخايفين علي، ولادهم منهم..
رسالة لكل الناس اللي شافت بعنيها أولادهم بيتنمروا لفظيا او حتي جسديا علي ملائكة الله في أرضه.. وماقالوش عيب.. ولا زجره ونهاه بحزم وقالة اخوك ده مختلف يمكن.. بس لازم تلعب معاه ونتقبلة.
رسالتي للأهل والجيران والأقارب والمجتمع.
اولا الدعم والتقبل
ادعم صاحبك .. جارك ..اخوك اللي عنده ابنه او بنته من ذوي القدرات الخاصة. دعمك ليه ووجودك جنبه ولعب ولادك مع أولاده تخفيف عنه الحمل. وبيحس بالأمل والمشاركة والأمان والاطمئنان ودفعه ليه انه يكمل المشوار 👍🌷
ادعمه بكلامك وافعالك وحسن انتقاء ألفاظك.
ادعمة بابتسامتك ليه
ادعمة بسكوتك وكفك عن أي كلام او نظرات ممكن تسبب له ضيق والم.
ادعمة بالصبر على تنطيط ابنة وصوتة في البيت.. ادعمة لما بنتك او اختك تجيلك البيت وتقولك ماتشغلش التلفزيون عشان ابنها ساعدها وحسسها انه بيتها.
لا تنزعج ولا تغضب على صراخ ولد او بنت من ذوي القدرات الخاصة.
ادعمهم بالابتسامة وسلم عليهم ولا تسخر من شكلهم او طبعهم او سلوكهم..
لا تتجنبهم... مش هيعدوك او هياكلو ولادك مثلا.
ثانيا اولادنا مختلفون
اولادنا مختلفون
مختلفون في التفكير وفي التواصل والتعليم والتدريب
اولادنا مختلفون في القدرات والتدبير والتعبير.
مختلفون في القلب والاحساس وقد يختلفون في الشكل أيضا..
لكنهم من أرقى وانظف ما أنجبت الإنسانية.
مختلفون لا ينافقون ولا يكذبون ولا يتتمرون.
هم بشر مثلنا بل ارقي وانقي..
هم لا يعرفون سبب انزعاج الناس لوجودهم...
قد يبدو ابني منكمشا علي نفسه ويرفض البقاء، مع الآخرين..منعزلاً وحيدا... فلا تعيدوه الي الوحدة.. ورحبوا به في عالمكم..
قد يبدو عنيفا احيانا لانة خائف من الآخرين... فلا تخافو منه وعلموه بكل لطفٍ وعناية.
قد لا يفهم ابني الكلمات... وقد لا يعي النظرات والحركات فلا تيأسو منه. ولا تفقدوا الامل فيه..
قد تعلمون متطلباتة وتفهمون مايريد فلا تبخلو علي ابني بالتقبل والاندماج والتعايش معكم..
لا تصنفوه ولا تعتزلوه
لا تعاملوة بقسوة مميتة ولا بالشفقة التي يشعر معها انه تصنيف ثان من بني الانسان..
لا تخافوه ولا تخافو علي أولادكم منه
فقط.... أحبوه
ثالثا التنمر الخفي
فيه تنمر مباشر
وتتمر غير مباشر
وانا اعرف ناس محترمة جدا جدا ويقولو كلام احيانا معناه ضمنيا تنمر "غير مقصود" لان فيه ناس منهم انا اعرفهم شخصيا وناس محترمة ولكن بيخونهم التعبير
زي مثلا لما يحبو يتريقوا علي حد صاحبهم ساكت او مش فاهم حاجة معينة يقولو ده عنده توحد
وده لفظ غير موفق بالمرة.. لأنه بيربط قلة الفهم وقلة الوعي والمرض النفسي وبين (المصابين بالتوحد) وهذا غير صحيح.. انا ابني توحد وهم من انقي البشر واطهرهم.. وان كان ذلك اضطراب عندهم ضعف في التواصل واللغة فهذا ما قدرة الله عليهم.. بخلاف من أعطاه الله إمكانيات اكبر وعطلها بإرادتة... انا عارف ومتاكد ان فيهم ناس لا تقصد اهانة المصابين بالتوحد... ولكن حبي لهم شجعني ان اتعاون لتغيير ثقافة الناس من ربطهم لأي سلوك سيئ باخرين مجبولين علي ذلك.. 😍
الكلام ده انا شفته بعيني وناس اعرفهم.. واحدة حاطة صورة صديقة ليها وهي زعلانة وكاتبة "كائن متوحد عدو الفرحة" 😢
واحد صديق ليا حاطط صورة فنانة اسمها ورده جوا ورده وكاتب "شاب متوحد"
واحد محترم جدا اعرفة وصف صديقة اللي، واخد جنب عنهم انه "عنده توحد"
المواقف دي بالتأكيد مش، مقصودة ولكن لابد اننا نغير اسلوب الكلام
و نراعي جدااحساس الأمهات والآباء لأنهم بيعيشو
عناء وتحديات يومية دقيقة بدقيقة وساعة بساعة، ولا نعرف الى اي مدى الامهات يحاولن ان يحققن ابسط الأهداف كل يوم من اجل تطوير مهارات اطفالهن حتى الشخصية منها..
فبلاش الكلام اللي من عينة
١- مش، ممكن أتصور انتي ازاي مستحملة كل ده "الله يساعدك"
قد تقال بحسن نية لكنها قد تؤثر سلبيا علي الام
٢_ او مثلا والله انتي مسكينة وحالتك تقطع القلب. قد يكون شعور بالتعاطف واحساس بالشفقة غير ان هذه الكلمات غير مناسبة لام الابطال اللي عندهم إمكانيات وقدرات فائقة
٣_ مثلا اديني ابنك او لو دي بنتي كنتي شفتي انا عملت ايه معاها واتغير حالها ازاي
اسكتي ياحجة الله لا يسيئك 😂
٤- او مثلا كله بسبب انك تأخرتي في الإنجاب او مثلا ماتجيبيش ولاد تانى عشان تعرفي تربيه او خديه لشيخ يقرأ عليه
"انتي مالك... خليكي في حالك 🤛😂"
رابعا قل خيرا او اصمت
إما ان نقول خيراً .. او لنصمت..
من ابتلي باعاقة في جسدة. حالة افضل الف مرة ممن ابتلي باعاقة في أخلاقة وروحة
الجلوس على الكرسي او التمتمة او السرحان او الصراخ ليست هي الإعاقة.
إنما الإعاقة إعاقة الأخلاق إعاقة التفكير. إعاقة الإنسانية والاحساس والضمير
خامسا جبر الخواطر
الحياة لا تصفو لاحد في الدنيا
ومابين ابتلاء وابتلاء، يأتي ربك بالعطاء
فاجبر بخاطر الأطفال دول بحبك ليهم.. وخوفك عليهم وتقبلك لاوضاعهم
اجبر بخاطر ابنك بدعواتك ليه ولاولادة بالشفاء، والصلاح
اجبري بخاطر بنتك بدعمك ليها وتقوليلها ان ربنا اصطفاها مش ابتلاها.. عشان تكون بطلة ومثال للصبر والايمان والتحدي.
قوليلها ابنك احسن الناس.. وهيبقي، كويس.. اسالي عليها واعزميها هي وأولادها. ماتحسسيهاش ان عندها مشكلة كبيرة عشان ابنها.. وانها لازم تعيش عادي.
أجبر بخاطر جارك لو ابنه عمل حاجة قوله ولا يهمك يابطل..
من شكر نعمة ربنا عليك انك تساعد جارك اللي عندة ابن من ذوي الهمم وتجبر بخاطرة ولو بكلمتين دعم هيفرقو معاه كتير.
جبر الخواطر لينا مالوش علاقة بالغني والفقر
مالوش علاقة بالوضع الاجتماعي
مالوش علاقة بالقرابة ولا انت مين وبلدك ايه
جبر الخواطر ممكن تكون كلمة تغير مسار انسان
ممكن رد علي استفسار او سؤال يحل مشكلة كبيرة
ممكن سلام بالايد علي ابن من أولادنا يخلينا اقوي ويدينا امل في بكرة.
جبر الخواطر عبادة بسيطة وقيمتها كبيرة عند الناس واجرها عظيم عند رب الناس
جبر الخواطر موقف.... كلمة... احساس.. بيرفع الحرج عننا ويخلينا نعيش حياتنا ومنخافش من الناس ولا من الاحراج..
انا قولت موقف وهقولة تاني... محل انا رحتة اشتري عباية لزوجتي ومعانا انس... انس عندة فرط حركة قلت لصاحب المكان انس توحد قاللي سيبة براحتة واداله كورة يلعب بيها...
موقف بسيط فرق معانا جدا
سادسا كيف ننشر الوعي؟
اولا بالتثقيف الذاتي.. يعني لازم نكون احنا عندنا وعي نقدر ننقلة للناس.
اكثر ما يضر بابنائنا هي الاستهانة بمشاكلهم واحساسهم ومشاعرهم
واعتبار انه مش بيحس او انه انسان الي.
التوحد او عدم السمع او عدم الكلام. متلازمة الحب ليس خيارا لابناء ولا لينا.. بل قبول
مايهمناش وصف اولادنا انهم مرضي او لديهم اضطراب. ليس هذا هو المهم.
المهم هو تثقيف الناس ونشر الوعي.. والصبر علي جهلهم بحالة وطبيعة اولادنا.. عشان نقدر نغير الواقع.. عشان احنا لما نعيد تأهيل وتعديل سلوكيات الناس اليوم.. نلاقي بكرة داعم ومتقبل لولادنا. في وقت الله اعلم نكون احنا موجودين او لا.
الاصرار علي نشر الوعي سيجلب لك الكثير من الإنجاز. والارادة هي سر القوة الخفية. تدفعنا لمواصلة الطريق.
حاصر حصارك... وابعد عن كل مايسقطك. وستثبت لك الأيام ان ماظننتة قلاع من صخور إنما هي حصون من ورق.
لا أحد يسلم من صفعات الزمن.. فكن درعا لابناءك... وسندا قويا وتحصن بالعلم والارادة والوعي والصبر.
سابعا لغات اخري للتواصل
أطفالنا من له اذن لايسمع بها او عين لا يرى بها فله قلب يسمع ويري ويحب ويتمني
أطفالنا من له عقل لا يعي بعض الأمور فله احساس ومشاعر وصوت صادق مسموع.
من اختلف من أطفالنا في شكل او صوت أو سلوك فهو اختلاف كاختلافنا...
يتواصلون معنا بالاشارة والاحساس والحب والنظرات..
لديهم لغات اخري للتواصل تعلمناها معهم.
فابنائنا من ذوي الارادة كسائر البشر لهم احساس وكيان. يحتاج من يشعر به ويفهمه ويمد له يد الدعم والمشاركة.
هم لا يريدون الشفقة. هم يريدون ان يشعروا انهم من نسيج هذا المجتمع وكيانة.
انهم ليسو نكرة... او صفحات مطوية في كتاب النسيان.
انهم ليسو ضعفاء، ولن يستكينوا
هم منا ومثلنا ولهم حقوق علينا وعليكم.. فاحبوهم وافهموهم. وتواصلو معهم بلغاتهم علي بساطتها.
فقط نفهم عالمهم... نتحد من أجلهم.. ونسهل عليهم التواصل والاتصال مع المجتمع.
ثامنا شكرا ابي شكرا اهلي وجيراني
شكرا ابي "رحمه الله" علي دعمك ليا ولابني بالجهد والصحة والمال.
شكرا علي كل مشوار مشيتة علي رجليك وانت كبير السن عشان تحضر جلسة مع انس. شكرا علي كل ساعة مشي مشيتها مع انس كل يوم عشان يهدي وينام كويس.
شكرا امي لما قلتي لاخواتي "انا كبرت ومش قادرة ووهبت ماتبقي من صحتي لأنس بس"
شكرا اخواتي واهلي علي اهتمامكم ودعمكم وحبكم لأنس.
شكرا لجاري اللي قابل انس واحتصنة وسلم عليه وهزر معاه
شكرا لجاري اللي ساب بيتة ونزل الشارع يمسك بانس عشان لا يتعرض للخطر.
شكرا لجاري صاحب البقالة.. اللي سمح لأنس يدخل في اي وقت وياخد الشيكولاتة المحببة ليه وحتى كان بيستحي يطلب ثمنها مننا.
شكرا لجاري اللي سمع بكاء، وصراخ انس وخبط وتنطيط ولم يتضجر ولم يشتكي.
شكرا لجاري اللي جالي البيت وفي ايدة انس وقاللي انس كان نازل لوحدة وخفت عليه.
شكرا لجاري اللي عزمني على عقيقة ابنه وأصر اني اخد انس معايا ويقدم له الاكل بنفسه وكل ماقول لأنس اقعد يقولي سيبة براحتة.
وشكرا لجاري اللي قاللي "اظن ان انس مطلع عينك"
قلتلة "انس هوة عيني"
صدقوني الناس فيها خير. وييجي منها الخير.. ولكن محتاجة لحد يفهمهم بلطف ويعرفهم بحكمة.. وزي مافيه واحد متنمر فيه الف داعم ومشجع.
دمتم علي وعي وفهم وخير
دمتم علي حب نفع الغير
أ/هانى ذكى
أب لطفل توحدى
